Nata e kadrit - moment historik për tërë njerëzinë

Mr. Shaqir FETAHU



Kjo natë paraqet festë të vërtetë për të gjithë muslimanët e botës, për
arsye se jo vetëm që është rast i vetëm në historinë e njërëzimit, por
ka një rëndësi të posacme, vlerë të madhe dhe të përhershme. Për vlerën
dhe rëndësinë historike të kësaj nate flet edhe fakti se Kur'ani
Famëlartë kësaj nate i kushton edhe një sure të plotë, të cilën e emron
po me këtë emër - kaptina e Kadrit, e qe në gjuhën shqipe ka këtë
domethënie:

"Ne e shpallëm atë (Kur'anin) në natën e Kadrit. Çka po të shpjegon ty
se çka është nata e kadrit? Nata e kadrit është më e mirë se një mijë
muaj, në të cilën, me lejen e Zotit të tyre, zbresin melekët dhe
shpirti (Xhibrili) për secilën cështje. Ajo (që përcakton Zoti) është
paqe deri në agim të mëngjesit." (Kadr: 1-5)







Pra, kjo kaptinë kur'anore bën fjalë për një natë të madhe, me rëndësi
dhe peshë të pakufishme, të cilën Kur'ani Famëlartë e emëron me emrin
"Lejletul Kadër", që do të thotë "natë e vlefshme dhe e rëndësishme".
Në kaptinën tjetër të Kur'anit Famëlartë, me emrin "Ed Duhan", kjo natë
quhet "Lejletun mubareketun", që do të thotë "natë e bekuar", "natë e
dhuratave më të mëdha".



Pra, sipas fjalëve të cituara kur'anore, nata e Kadrit është nata më e
vlefshme dhe më e rëndësishme, ngase në të ndodhi zbritja e Kur'anit,
gjegjësisht zbrtja e dritës për mbarë botën. Këtë më së miri do ta
kuptojmë vetëm nëse e analizojmë kohën e para ardhjes së Muhammedit
[sal-lall-llahu alejhi ve sel-lem], respektivisht para zbritjes së
Kur'anit Famëlartë, kohë kjo të cilën e karakterizonin xhahilijjeti
(injoranca) i paparë, respektivisht errësira, adhurimi i idhujve në
vend të Zotit të vërtetë, eksploatimi, tirania, nënshtrimi i një
populli nga populli tjetër, diskriminimi i femrës, vrasja, grabitja,
dhuna, amoraliteti etj. Shkurt thënë, ishte kohë kur njeriu kishte
humbur dinjitetin e vet, pozitën e caktuar nga All-lahu i Madhërishëm
si mëkëmbës i Tij në tokë, pastaj totalisht kishte haruar Zotin dhe
marrëdhëniet ndaj Tij, vetvetes, familjes, natyrës dhe botës në
përgjithësi. Mirëpo All-llahu i Madhërishëm, duke patur mëshirë të
madhe ndaj krijesës më të dalluar që krijoi – njeriut, në muajin e
Ramazanit, konkretisht në natën e njëzet e shtatë të tij, respektivisht
në qetësinë e Natës së Kadrit, zbriti Kur'anin Famëlartë prej Leuhi
Mahfudhit në Es Semau Dunja (qielli i dunjasë) në bejtul izze. Në këtë
natë, pra, në tokë zbriti Kur'ani Famëlartë, respektivisht imperativi i
shenjtë i All-llahut të Madhërishëm përmes Muhammedit [sal-lall-llahu
alejhi ve sel-lem] për tërë njerëzimin, e që është: "Ikre", që do të
thotë "Lexo", "Mëso". Imperativ dhe rregull ky që paraqet principin
kryesor të të kuptuarit të Krijuesit, jetës, si dhe të jetuarit në të
me fatbardhësi dhe lumturi. Ky parim, pra, ia mësoi njeriut te Vërtetën
- Krijuesin, marrëdhëniet e njeriut me Krijuesin, me vetveten dhe me
gjithçka që e rrethon atë, dhe në këtë mënyrë njerëzimit ia hapi dyert
e shpëtimit dhe zhvillimit të përgjithshëm në të gjitha sferat e jetës.
Andaj, Nata e Kadrit, si ngjarje më e rëndësishme dhe më madhështore,
paraqet kthesë të vërtetë në historinë e njerëzimit, sepse, siç u cek
më lartë, shpallja e Kur'anit në këtë natë të madhe lidhi qiellin me
tokën, njeriun me Krijuesin e tij, dhe në këtë mënyrë njeriu hyri
përsëri në histori, duke mos mbetur objekt pa përmbajtje dhe pa kuptim,
përkundrazi, me këtë ai bëhet subjekt kreativ dhe mëkëmbësi vërtetë i
All-llahut në tokë, duke i dhënë kahje të vërtetë dhe të mbarë
historisë njerëzore, duke u bë fjalë e gjallë dhe zakon i jetës, sipas
të cilit ndërtohet aktivitet komplet i jetës dhe përmes të cilit
drejtohen dhe udhëhiqen idetë, dëshirat dhe veprat konstruktive dhe
humane.



Pa dyshim, nata e Kadrit në të njëjtën kohë paraqet natën mjaft të
dobishme për çdo besimtar i cili dëshiron t'i afrohet All-llahut të
madhërishëm dhe spastrimit të tij shpirtëror. All-llahu i Madhërishëm
për vlerën e kësaj nate thotë:

"Nata e Kadrit është më e mirë se njëmijë muaj, në të cilën, me lejen e
Zotit të tyre, zbresin melekët dhe Xhibrili për të gjitha çështjet.
Paqe! Ashtu derisa të agojë mëngjesi."

Vlera dhe dobia e kësaj nate është shumë e madhe për atë që di ta
shfrytëzojë, kur dihet se vlera e kësaj nate është më e madhe se një
mijë muaj dhe se në këtë natë zbresin melekët në qiellin e dunjasë, në
tokë, rreth njerëzve, për të përcaktuar me urdhërin e All-llahut të
Madhërishëm çdo çështje të vitit mbi jetën, furnizimin etj. Në të
njëjtën kohë, melekët në këtë natë përshëndesin besimtarët me selam dhe
zbatojnë vendimet e All-llahut të Madhërishëm. Kalimi i kësaj nate në
aktivitete në emër të All-llahut në ibadet, është më i vlefshëm se një
mijë muaj tjerë në ibadet, të cilët muaj janë të barabartë me 83 vite
jetë.

Kjo natë është e tillë, sepse në këtë natë All-llahut të Madhërishëm i
luten melekët, njerëzit dhe gjithçka tjetër. Këtë më së miri e kuptojmë
nga hadithi i Muhammedit [sal-lall-llahu alejhi ve sel-lem]:

"Kur hynë nata e Kadrit, zbret Xhibrili me grupe melekësh duke bërë
lutje dhe duke sjellë salavate çdo kujt që në këmbë dhe ulur përmend
All-llahun e Madhërishëm".



Pastaj hadithi tjetër thotë kështu:

"Kush e kalon në ibadet (adhurim) natën e Kadrit, me besim të plotë
duke llogaritur në begatitë e saj, do t'i falen gabimet e mëparshme".

Për t'u arritur të gjitha këto begati të kësaj nate, besimtari duhet në
këtë natë të hyjë me besim të plotë, vendosmëri të pastër, qëllim të
mirë dhe human, me bindje dhe përkushtim të plotë, duke e përjetuar atë
thellë në shpirt dhe zemër, dhe në të njëjtën kohë gjithçka në
organizmin e tij të jetë në lëvizje dhe aktivitet të plotë, si shpirti,
zemra, të të menduarit dhe gjuha e tij, ndërsa trupi i tij të jetë i
qetësuar dhe i çliruar nga çdo shtypje materiale. Në këtë natë të qetë
njeriu duhet të inkuadrohet në një harmoni të përsosur shpirtërore,
sikur që është harmonia e aktivitetit të melekëve dhe harmonia e
trupave qiellor në gjithësi. Në një përgatitje të këtillë, njeriu duhet
maksimalisht ta shfrytëzojë këtë natë duke iu lutur All-llahut të
Madhërishëm, duke lexuar Kur'an, duke falë namaz dhe duke lidhë të
menduarit e tij dhe shpirtin me All-llahun e Madhërishëm etj. Aishja
[radijall-llahu anha], bashkëshortja e Muhammedit [sal-lall-llahu
alejhi ve sel-lem], tregon se njëherë e ka pyetur Muhammedin
[sal-lall-llahu alejhi ve sel-lem]: "Çka mendon, sikur të dija se cila
është nata e Kadrit, çka të lexoj në të?" Muhammedi [sal-lall-llahu
alejhi ve sel-lem] i përgjigjet: "Thuaj: O Zot im, Ti je Falës, e don
faljen, më fal mua".



Nata e Kadrit, përvec që duhet të jetë natë e adhurimit, ajo në të
njëjtën kohë duhet të jetë edhe natë e këshillave dhe e mësimit ofruar
vetvetes dhe të tjerëve. Kjo del nga fakti se besimtari e ka obligim të
domosdoshëm të lexojë, mësojë dhe të tjerëve t'ua përcjellë atë. Në çdo
moment dhe situatë, e posaçërisht në këtë muaj të bekuar të Ramazanit
dhe në këtë natë të madhe të Kadrit. Muhammedi [sal-lall-llahu alejhi
ve sel-lem] njëherë i tha Ebu Dherr El Gafariut: "O Ebu Dherr, të
zgjohohesh herët dhe t'ia mësosh dikujt një ajet nga libri i All-llahut
(Kur'ani) është më e vlefshme se të falish njëqind rekate namaz
(vullnetar-nafile), e të zgjohesh herët dhe ta mësosh një pyetje
shkencore, veprove apo jo sipas saj, është më mirë se të falish një
mijë rekate namaz (vullnetar-nafile)".



Esenca dhe porosia thelbësore e kësaj nate është që besimtari me
vetëdije të lartë t'i kthehet vetvetes, me qëllim që ta gjejë dhe
definojë e përcaktojë veten, ta gjejë pozicionin dhe vendin e vet, si
dhe të vendosë si dhe kah më tutje, të shikojë veprimtarinë e tij në të
kaluarën dhe të tashmen, duke u munduar të jep përgjigje për pyetjet
esenciale të jetës së njeriut, si për shembull: Si erdhi dhe nga erdhi
në këtë botë? Kush është ai? Kush është Krijuesi i tij dhe çka është
qëllimi i ardhjes së tij në këtë botë? Cili është pozicioni i tij në
këtë botë dhe çfarë janë marrëdhëniet e tij me botën që e rrethon? Cili
është misioni i tij në këtë botë dhe si do të jetë kalimi i tij në
botën tjetër? etj, etj. Përmes këtij meditimi të thellë shpirtëror dhe
intelektual në këtë natë të madhe, ai do të vijë në përfundim se askush
në këtë botë nuk ka ardhur rastësisht, e as sipas dëshirës së vet, por
është i krijuar me qëllim të caktuar, për të njohur Krijuesin -
All-llahun Fuqiplotë, për të jetuar sipas parimeve të Tij të shenjtë,
duke qenë mëkëmbës i vërtetë i Tij në tokë dhe në këtë mënyrë ta
ndryshojë botën kah e mira, t'i japë asaj përmbajtje dhe duke e zbuluar
atë me qëllim të shfrytëzimit të begative të saj të dhuruara nga
All-lahu Fuqiplotë, në shërbim të njeriut.



Pra, nata e Kadrit është një moment i kthimit të njeriut kah vetvetja
dhe e reformimit të tij shpirtëror dhe intelektual, duke ripërtrirë
personalitetin e tij drejt përsoshmërisë morale, fizike dhe
shpirtërore. Ja se si meditonte dhe si i kthehej vetvetes i Dërguari i
All-llahut, Muhammedi [sal-lall-llahu alejhi ve sel-lem]:

"All-llahu im! Mi falë gabimet e mia, padijen time dhe të kaluarit e
kufirit. All-llahu im! Ma falë joseriozitetin tim, shpejtësinë dhe
gabimet e mia, lëshimet e paqëllimta dhe gjithçka që rrjedhë nga unë.
All-llahu im! Më falë atë që kam vepruar dhe që do të veproj, dhe atë
që e kam bërë fshehurazi dhe haptazi, dhe atë që e din se është tek
unë. Ti je që i paraprinë gjithçkafit. Ti je i Fundit dhe i
Plotëfuqishëm".

Parashtrohet pyetja, se cila prej netëve është Nata e Kadrit? Nuk ka
dyshim që Nata e Kadrit bie në muajin e Ramazanit, por dijetarët islamë
nuk janë në ujdi se cila natë e Ramazanit është ajo, për arsye se nuk
është e caktuar as në Kur'an e as në hadithet e Muhammedit
[sal-lall-llahu alejhi ve sel-lem]. Sipas disa haditheve të Muhammedit
[sal-lall-llahu alejhi ve sel-lem], na jepet të kuptojmë se kjo natë
duhet të lypet në dhjetë ditët e fundit të Ramazanit të bekuar, ndërsa
duke u bazuar në shumë hadithe të Muhammedit [sal-lall-llahu alejhi ve
sel-lem] shumica e dijetarëve islamë janë të mendimit se ajo natë është
nata e njëzet e shtatë e këtij muaji të bekuar. Urtësia e
mospërcaktimit të saktë të kësaj nate as në Kur'an e as në hadithe të
Muhammedit [sal-lall-llahu alejhi ve sel-lem] qëndron në atë që
besimtari edhe më tepër dhe fuqishëm të thellohet në adhurim dhe vepra
të mira në pjesën e fundit të Ramazanit, e jo vetëm në natën e Kadrit.

Pra, Nata e Kadrit është natë e madhe, natë e kthesave historike dhe
ripërtrirjes së njeriut dhe mbarë njerëzisë në të gjitha sferat e
jetës, natë që i dha shenjtëri besimit, dijes e shkencës, meditimit të
pastër, forcimit të personalitetit dhe ngritjes së vetëdijes së njeriut
rreth Krijuesit, vetvetes dhe gjithçkahit që e rrethon atë, humanizimit
të tij të përgjithshëm vetëm për një qëllim: që njeriu të jetë mëkëmbës
i vërtetë i All-llahut në tokë dhe gjithësi.



Në fund lusim All-llahun e Madhërishëm që të na jep mundësi dhe aftësi
që me bindje të plotë t'i qasemi kësaj nate, me qëllim që sa më mirë ta
përjetojmë dhe sa më mirë t'i shfrytëzojmë vlerat dhe begatitë e saj.



mesazhi.com