Interviu me Ferki Shala--Nga grupi TNT i cili e pranoi islam

Shkruar nga Ram Dalipi





Monday, 06 November 2006



JU RRËFEJ ARËSYET E MIA: JA PSE E LASHË MUZIKËN DHE U KTHEVA N’RRUGË TË ZOTIT

Nga Gazeta Java /

“El-hamdulilah: Më në fund u bana njeri”



Ishte në kulmin e karrierës së tij prej këngëtari të suksesshëm
kur vendosi papritmas ta braktiste muzikën përgjithmonë. Kishte bërë
nam të madh me këngët e tij të njohura në Kosovë dhe kudo tjetër.
Muzika e tij popullore dhe zbavitëse dëgjohej nga mija simpatizatë.
Këndonte edhe në disa gjuhë të tjera përveç shqipes. Shetiste tërë
botën për t’ju sjellur prehje simpatizatëve të shumtë nga mbarë bota.
Përfitonte para të shumta nga profesioni i tij si muzikant dhe bënte
një jetë luksoze. Jeta e tij i ngjante një labirinti të çuditshëm.
Suksesi dhe fama që fitoi nga profesioni i tij bënë që ai ta formojë
një personalitet jo aq të mirë. Si pop-rocker, ishte “normale” për të
që të jetë në shoqëri me duhanin, alkoolin si dhe drogën. Periudha e
viteve ‘92-’94 kishte qenë më e keqja për të, kur ai kishte filluar që
ta përdorte edhe “pluhurin e bardhë”. E pranon me krenari se gjithnjë
ka qenë besimtar musliman, por kësaj dhuntie nuk ia ka ditur vleftën.
Temperamenti i tij edhe në të kaluarën ishte i tillë, saqë mund të
duronte çfarëdo fyerje që i bëhej, përveçse dikush të fliste keq për
fenë islame, për Zotin e Madh, dhe për Muhammedin, alejhi selam. Në
moshën 40-vjeçare, pas sprovave të shumta, kishte filluar të mëndojë
seriozisht për qëllimin e tij të jetës: “Përse jetoj dhe çfarë do të
bëhet me mua pasi të vdes?”. Kishte filluar një “betejë” me vetveten,
për të bërë ndryshime pozitive në karakterin e vet: filloi me
braktisjen e duhanit, të cilin e kishte konsumuar shumë, por as kjo nuk
i mjaftoi. Vuri në shenjestër alkoolin si shprehinë më të madhe të tij,
dhe për një moment i vuri vetes detyrën që ta braktisë atë për nje
kohë, së paku për një vit. Një natë kur ishte i vetëm në banesën e tij
në Mitrovicë, ku kishte qëndruar zgjuar deri në mëngjes duke punuar,
befas dëgjon tinguj e ezanit të sabahut. Fjala “All-llahu Ekber (shqip:
Zoti është më i Madhi), ia kaplon zemrën dhe ndjenjat e tij
shpirtërore, dhe vendos definivisht që t’i kthehet Zotit, i penduar nga
e kaluara e tij.
Braktisë menjëherë muzikën pak ditë pasi e kishte montuar albumin e tij
të dhjetë, albumin jubilar, dhe i kthehet xhamisë. I falur vathët e
shumtë që i kishte në veshët e tij, unazat e shumta, dhe i pret flokët
e gjata që i kishte, duke ndryshuar pamjen tërësisht. Flokët sot i mban
të shkurta, veshjen shumë modeste, orën dhe një unazë të vetme e ka të
vendosur në dorën e djathtë me motive islame. Mjekrrën prej rockeri e
ka plotësuar me mjekërr të plotë, sipas Sunnetit të Muhammedit, alejhi
selam. Thotë se ky ndryshim është gjëja më e mirë që e bërë në jetën e
tij.
“Kam përdorë para të shumta në jetën time, dhe asnjeherë nuk kam ndier
kënaqësi. Tash më ndodh shpesh që ta kaloj ditën me nga 3-5 euro, bile
me tërë faljen time dhe kjo na mjafton. Askush tjetër nuk punon nga ne,
përveç meje. Kam një rrogë simbolike në RTK, ku jam duke punuar ende
dhe me te kalojmë për mrekulli. Marr hua në shitore dhe nuk merzitem
aspak. Dua të bëj jetë të ndershme dhe Hallall”, thotë Ferki Shala, ish
vokalisti i TNT. Sot ai karakteri i tij i vrazhdë, që ishte dikur,
është shndërruar tërësisht. Flet me zë të butë dhe të qetë. Gjatë tërë
bisedës që ai zhvillon me të tjerët, dominon fjalimi prej një muslimani
të përkushtuar. Fjala “El-hamdulilah”, që në shqip domethënë,
Falënderimi i qoftë Zotit, është shprehja më e theksuar nga ai. Xhamia
“Isa Beg” në Mitrovicë i është bërë shtëpi e dytë, ku e kalon kohën më
të madhe duke falur namaz, duke kënduar Kur’anin dhe duke bërë lutje
tek Zoti për veten dhe të tjerët. Banesa e tij në qytetin e ndarë të
Mitrovicës, ndodhet pikërisht në pjesën veriore, dhe për këtë hall ai
shprehet shumë i brengosur. Thotë se pikërisht sot, pasi i është kthyer
fesë islame, sinqerisht ndien dhembje të madhe për problemin e
Mitrovicës, dhe tash intenzivisht e lut All-llahun që të mundësojë
zgjidhjen e problemit të këtij qyteti. “Më mundon jashtëzakonisht
problemi i qytetit tonë të ndarë - Mitrovicës, dhe thënë të drejtën,
pasi kam filluar ta falë namazin, bash qitash kam filluar t’ia di
vleftën vendit tim. Ta kishim të paktën një xhami atje mirë do të
ishte…”, thotë në intervistë ekskluzive për JAVA, ish-vokalisti i
famshëm i bendit TNT. Java : Na thuani diçka për ju, për biografinë tuaj?

Ferki Shala: Bismilahi Rrahmani Rrahim!
Jam Ferki Shala nga Mitrovica. Jam i lindur më 28 gusht 1963, në
Mitrovicë. Tash jam në moshën 43-vjeçare. Jam djali i Fahri Shalës nga
Tirana, ndërsa nëna Sadija është nga Novi Pazari. Jam i martuar dhe kam
dy vajza, Illdan dhe Rejalldan. Momentalisht jam duke punuar ende në
RTK me “Big Bend”.
Java : Keni bërë emër me muzikë. Pikërisht në kohën kur arritët
në kulmin e famës, braktisët muzikën. Si kishit filluar karrierën në
muzikë?
Ferki Shala: Eh…karriera ime! Thënë të drejtën, unë shpesh po
përpiqem t’i shmangem kësaj pyetje, por megjithatë do të ju përgjigjem!
Kuptohet se muzika ka qenë arsyeja kryesore që Ferki Shala ishte i
njohur në masë të madhe. Ndërsa sot unë jam i dëshpëruar shumë nga ajo
karriera ime dhe, natyrisht, jam edhe i penduar thellë. Tash jam i
përqëndruar që tërë potencilalin tim dhe aftësinë time që më ka dhuruar
Zoti ta përdor ashtu si edhe kërkon Zoti, pra si musliman i
përkushtuar. Me një fjalë, të gjitha të mirat që mund t’i kam, tash për
tash edhe talentin tim që ma ka dhënë Zoti, jam duke bërë përpjekje që
t’i ushtroj në destinacionin e duhur - në Islam dhe për Islamin.
El-hamdulilah që Allahu deshi të më mëshiroj dhe më në fund t’i kthehem
vetvetes, pasi kisha kaluar në një pozitë shumë të pakuptimtë të jetës
sime. Sa i takon karrierës sime prej një muzikanti të suksesshëm, duhet
të përmendi vitin 1978, vit ky kur kam filluar të merrem
profesionalisht me muzikën. Unë së bashku me disa shokë bëmë një bend,
me emrin, “Boom Bendi”, këtu në Mitrovicë, me të cilin vazhduam nja 5-6
vjet. Pas kësaj periudhe fillova me TNT-në edhe në program dhe në vitin
1984 nxorëm edhe albumin e parë. Ndërkohë shkova edhe në ushtri në
Mostar, pra, në ish-Jugosllavi. Atje qëndrova plot dy vjet dhe pas
kryerjes së shërbimit ushtarak bëja muzikë me disa bende të atjeshme,
dhe pas kësaj kohe shkova në Zagreb, ku punoja. Edhe atje bashkëpunova
me disa grupe ngapak. Kështu edhe albumi im i parë doli këtu dhe punët
shkonin shumë mirë. TNT-ja bëri një emër të madh dhe ne u bëmë të
famshëm shumë shpejt. Mund të them lirisht se kaseta e parë e RTP-së
(Radio Televizionit të Prishtinës) me muzikën zbavitëse ishte pikërisht
nga grupi TNT.
Kështu, duke punuar edhe me TNT edhe me disa bende të njohura jashtë
Kosovës, pas nja 10-vitesh të fillimit, na doli edhe albumi i dytë, i
cili vërtet bëri jehonë të madhe dhe ne fituam popullaritet të madh.
Java : Cili ka qenë ky album?

Ferki Shala: Albumi ynë më i njohuri, “Biondina”, i cili edhe ma bëri sherrin më të madh. Qajo “biondina” ma bëri sherrin.

Java : Përse thoni se ia keni pa sherrin albumit, i cili në fakt ju bëri të njohur - ju solli përfitime dhe famë të madhe?

Ferki Shala: Po, tash po e shoh se e tërë e kaluara ime kishte
qenë sherr, dhe pikërisht kjo këngë më pati mundësuar që ta bëhësha i
njohur në masë të madhe si këngëtar.
Natyrisht, atëherë nuk kam menduar kështu, por tash e kam kuptuar shumë
mirë realitetin. Atëherë isha i ri dhe më dukej interesante kjo, por
tash ndihem i dëshpëruar shumë nga e kaluara ime. Inshallah Allahu m’i
falë të gjitha ato që i kam bërë në të kaluarën time. Pastaj, pas
albumit “Biondina”, vërshuan albumet tjera me radhë. Më 1996 doli
albumi “S’ka me shqipen tonë”, e disa të tjerë, deri në vitin e kaluar
që TNT-ja nxori albumin jubilar, albumin e vet të dhjetë. Incizimi i
albumit të fundit mua më kishte zënë në një pozicion të vështirë, sepse
pas incizimit të albumit, madje edhe spotin e kishim kryer, unë tashmë
kisha startuar të fali të pesë kohët e namazit. Ka pasur diku një javë
apo 10-ditë, ndërmjet kohës kur albumi “Luje belin luje” kishte dalur e
unë kisha filluar të fali namazin me rregull. Java : Si ndiheni tash pasi këni braktisur tërësisht muzikën
dhe keni filluar me faljen e rregullt të namazit. Si e vlerësoni të
kaluarën tuaj prej muzikanti të suksesshëm?
Ferki Shala: Të bëhemi të sinqertë, natyrisht se e ndiej veten
mirë, sepse kam pasur sukses të madh në profesion dhe kjo nuk është për
të ardhur keq. Së pari, secili njeri që është i ri mendon të bëhet disi
i famshëm dhe i suksesshëm në karrierë, dhe shumë njerëz nuk mund të
arrijnë të bëhen madje as të njohur. Të rallë janë ata që kanë suksese
të dëshirueshme. Ndërsa, ne, TNT, kishim bërë “bum” të madh jo vetëm në
Kosovë, por edhe në shumë vende të tjera të botës dhe Europës.
Pikërisht përmes muzikës neve na ishte mundësuar edhe të dalim në shumë
vende të ndryshme të botës dhe këtë unë e kisha dëshirë të madhe.
Përpara dilnim jashtë Kosovës edhe pa muzikë, ndërsa pas luftës e kemi
pasur shumë të lehtë që të dalim si muzikantë kudo që kemi dashur në
tërë botën. Mirë kalonim dhe nuk mund të mohohet se kemi pasur një
vlerësim të madh përmes muzikës. Dilnim dhe shëtisnim nëpër tërë
Europën dhe nëpër botë dhe kjo nuk ka qenë një gjë e vogël.
Nuk jam më TNT, por vetëm Ferkiu i thjeshtë




Java : Ju ka ndodhur që ta ndieni veten të lumtur gjatë kohës sa
merreshit me muzikë, meqë ishit në kulmin e karrierës, kishit bërë famë
dhe ishit shumë të suksesshëm para se ta braktisnit muzikën
përfundimisht?
Ferki Shala: Me muzikë…? Tash do të tregoj një gjë që ndoshta
është e vështirë që të besohet, sepse është shumë e çuditshme. Unë
besoj se jam i vetmi njeri në botë që jam marrë me muzikë prej ’78-tës
e që në tërë jetën time nuk kam dëgjuar më shumë se një muaj të plotë
muzikë, pra, për krejt këto 28-vjet të karrierës me muzikë dhe 43-vjet
të jetës që po i bëj tash, unë nuk di se a kam dëgjuar më tepër se
1-muaj të plotë vetë muzikë. Nuk e di si ta shpjegoj, muzika ka qenë
për mua vetëm ashtu “hajt” të këndoj dhe asgjë më shumë. All-llahu më
kishte dhënë këtë talent, më kishte dhënë zë të mirë, dhe më kishte
dhënë një shkathtësi që mund të këndoja këngë popullore, këngë
zbavitëse, pastaj këndoja edhe turqisht, greqisht, shqip e
boshnjakisht, çfarë të duash. Këngët e TNT-së kanë qenë të tilla që
kanë pasur interesim nga të gjithë, që nga fëmijët e vegjël e deri tek
pleqtë 70-80 vjet. Pra, ne bënim muzikë për të gjithë - madje edhe
nëpër vende të ndrsyhme të botës dhe Europës. Kështu që All-llahu më
kishte vënë në këto sprova të jetës, me këto sprova edhe më bëri njeri
dhe falënderoj prapë All-llahun që më në fund u bëra njeri.
Java : E konsideroni sprovë të hidhur apo sukses të kaluarën tuaj prej muzikanti të suksesshëm?

Ferki Shala: Unë gjithmonë më tepër e konsideroj një sprovë dhe
një periudhë të errët të jetës nën të cilën qëndrova me vite të tëra
larg së vërtetës. Nuk mund të mohoj se kam pasur karrierë të mirë për
të cilën ndoshta të gjithë do të lakmonin dhe mua më kishte mundësuar
Allahu që të kem sukses dhe famë në këtë mision të dështuar.
Java : Nuk mund ta mohoni edhe faktin se prej muzikës keni përfituar edhe para të shumta dhe keni bërë jetë luksoze?

Ferki Shala: Çka kam fituar prej muzikës? Për fat të mirë sot
nuk kam të trashëguar asgjë prej këtij fitimi. E tëra ajo që më kishte
mbetur nga përfitimet me muzikë ishte një kitarë, të cilën e kisha
blerë para pak kohe me paratë e fituara nga muzika, dhe atë e kam thyer
menjëherë. D.m.th., mund të ju them me plot përgjegjësi që i vetmi send
që e kam blerë prej muzikës ishte ajo kitarë. Pra, ndoshta jam ndër të
vetmit që përkundër fitimeve të mëdha që kishim në karrierë, pas
27-vjetësh që merrem me muzikë, vjet e kam blerë vetëm një kitarë, të
cilën e theva pastaj.
Nuk kam as banesë të blerë prej fitimeve të mia si këngëtar, as kerr,
as shtëpi dhe as garazhë. Pra, absolutisht asgjë nuk kam përfituar
materialisht nga muzika, edhe pse nuk mund të mohoj faktin se me muzikë
kam përdoruar para të shumta gjatë jetës sime. Ka pasur raste të shumta
kur as vetë nuk mund ta dija se sa shumë para kisha fituar. Mirëpo,
vetëmse i kam gjuajtur ato para ashtu siç i kisha marrë, pra më kanë
shkuar ashtu kot siç edhe i fitoja kot. Dhe nuk po them se kanë qenë
pak para, para të mira kam fituar, mirëpo Zoti ka dashur që të mos
përfitoj asgjë nga ato para; kanë shkuar ashtu si i kam marrë. Sot,
ndërkaq, jetoj një jetë të përkryer nën modestinë islame, kam vetëm një
rrogë të thjeshtë nga RTK-ja, ku jam duke punuar aktualisht me “Big
Bend”, dhe ato para që i marrë atje mezi me dalim për shpenzimet e mia,
rrugën dhe të tjera. Asnjë anëtar tjetër i familjes sime nuk është në
marrëdhenie të punës. Nuk kam asnjë të afërm diku jashtë që të më
ndihmoj materialisht, megjithëtatë jetojmë një jetë shumë më të
rehatshme. Në rast se mebtem keq për ndonjë harxh në familje, shkoj në
shitore dhe marr hua. Nganjeherë ma shkruajnë emrin TNT, në atë listën
e borxhit, dhe menjëherë ua tërheq vërejtjen që të mos ma shkruaj më
atë emër. Nuk jam më TNT, por vetëm Ferkiu i thjeshtë.






Azhuruar së fundi ( Friday, 16 March 2007 )

mashAllah

allahu e shperbleft kete vella per kete veprim shum te mir


shpresojm se ne te ardhmen edhe shoqria e tij do te kthehen ne fen e allahut